Ýmsar breytingar verða á lögum um fjarskipti samkvæmt frumvarpi sem Sturla Böðvarsson mælti fyrir á Alþingi í gær. Meðal annars á öll netþjónusta að falla undir hugtakið fjarskiptaþjónusta og fjarskiptafyrirtæki verða skylduð til að skjalfesta hvernig þau standa að net- og upplýsingaöryggi sínu. Einnig mælti ráðherra fyrir breytingum á vegalögum þar sem heimila á gjaldtöku af umferð og fleira.

 
Samgöngumál, fjarskipti og markaðsmál í ferðaþjónustu voru meðal umræðuefna í ávarpi Sturlu Böðvarssonar samgönguráðherra á aðalfundi Ferðamálasamtaka Íslands sem nú stendur á Ísafirði. Auk hefðbundinna aðalfundastarfa eru á fundinum flutt erindi um uppbyggingu markaðsstofu Vestfjarða og stefnumótun og miðlun upplýsinga. Ræðuna má sjá í heild hér á síðunni undir Ræður.

Hannes Kristmundsson nýkjörinn Sunnlendingur ársins leit við hjá samgönguráðherra á dögunum og afhenti honum þakkargjöf. Þar segir ,,Minnismerkið við Kögunarhól á Ingólfsfjalli í Ölfusi, sem reist var 19. des., 2006 við 52 krossa, minnir vegfarendur á nauðsyn þess að hugað sé vel að umferðaröryggi á Suðurlandsvegi og öðrum vegum landsins. Merkið og krossarnir eru fyrsti áfangi þess að koma upp varanlegum minnisvarða um þá sem farist hafa á veginum. Krossarnir minna á hversu mikilvægt það er að leita alla leiða til þess að ná hámarksöryggi í umferðinni með tvöföldun og lýsingu vegarins, góðum akstursmáta ökumanna og öruggum ökutækjum”. Undir skjalið rita hjónin Hannes Kristmundsson og Sigurbjörg Gísladóttir, áhugamenn um öruggan Suðurlandsveg.

Sturla Böðvarsson var á ferðinni á Vestfjörðum í dag og heimsótti meðal annars Flateyri og átti hádegisfund með sjálfstæðismönnum á Ísafirði. Jafnframt ráðgerði hann að vera viðstaddur undirritun samnings um vegagerð í Mjóafirði og ávarpa síðan aðalfund Ferðamálasamtaka Íslands.