Samgönguráðuneytið hefur samið við fimm sveitarfélög á Snæfellsnesi um að Snæfellsnes verði fyrst svæða á Íslandi, gert að umhverfisvottuðum áfangastað ferðamanna. Gert er ráð fyrir að ferðamennska á svæðinu verði stunduð með sjálfbæra þróun að leiðarljósi. Stefnt er að vottun Green Globe 21, alþjóðlegra samtaka um sjálfbæra ferðaþjónustu, og munu samtökin koma að vottunarferlinu.

Samgönguráðuneytið hefur tekið saman nokkrar athyglisverðar staðreyndir um samgöngur og gert úr lítið kver undir nafninu „Samgöngur í tölum 2003“. Í kverinu er gerður ýmis samanburður og sýnd þróun ýmissa atriða í þeim málaflokkum sem falla undir samgönguráðuneytið; vegamálum, ferðamálum, flugmálum og siglingamálum auk fjarskiptamála.

Vegagerðin og verktakafyrirtækin Háfell og Eykt hafa náð samkomulagi um að flýta verulega framkvæmdum við þverun Kolgrafafjarðar. Nú er því gert ráð fyrir að verkið verði unnið mun hraðar en upphaflega hafði verið áætlað, þannig að almennri umferð verður hleypt á haustið 2004 um nýjan veg og brú yfir Kolgrafafjörð.

Á kjörtímabilinu sem senn er að ljúka hafa verið samþykkt 47 frumvörp og þingslályktunartillögur. Í meðfylgjandi texta eru taldar upp þingsályktunartillögur og frumvörp sem annars vegar hafa verið lögð fram á tímabilinu og hins vegar samþykkt. Í lok textans er að finna súlurit þar sem borin eru saman samþykktar þingsályktunartillögur og frumvörp samgönguráðuneytisins á árunum 1987 – 2003.

Út er komið rit á vegum samgönguráðuneytisins um það sem gerst hefur í meginatriðum á undanförnum árum í málaflokkum er heyra undir ráðuneytið. Fyrst og fremst er litið til síðustu fjögurra ára, en jafnframt er litið fram á veginn.